काठमाडौं । अर्थमन्त्री डा. प्रकाशशरण महतले स्थानीय उत्पादन बढाएर कृषिमा आत्मनिर्भर बनाउन कृषिजन्य वस्तुमा मूल्य अभिवृद्धि कर लगाइएको बताएका छन् ।
बिहीबार सिंहदरबारमा नेपाल कृषि मेसिनरी व्यवसायी संघ, कृषक संघलगायत संस्थाका किसानसँगको सामूहिक भेटका क्रममा अर्थमन्त्री डा. महतले देशभित्र उत्पादन गरिरहेका उद्योगी, कृषकलाई संरक्षण र कृषिमा आत्मनिर्भर बनाउन त्यस्ता वस्तुमा कर लगाइएको जिकिर गरेका छन् ।
उनले करका कारण आयातित वस्तु मात्र महँगो हुने र स्थानीय उत्पादनलाई असर नपर्ने तर्क गरेका छन् ।
करको दर लागु नहुँदै सुनियोजित रूपमा केही संगठित व्यक्तिहरूले मूल्यवृद्धि गरेको उनको भनाइ छ ।
उनले उत्पादनका आधारमा अनुदान दिने, गुरु किसान कार्यक्रमलगायत विषयलाई बजेटमा प्राथमिकतामा राखिएको जानकारी दिए ।
भेटका क्रममा ती संस्थाका प्रतिनिधिले आन्तरिक उत्पादनको संरक्षणका लागि सरकारको कदम स्वागतयोग्य भएको बताएका थिए । उनीहरूले यो क्षेत्रमा देखिएका समस्याको समाधान गर्नुपर्नेमा जोड दिएका थिए ।
