काठमाडौं । राष्ट्रिय स्वतन्त्र पार्टी (रास्वपा)का सांसद स्वर्णिम वाग्लेले सामाजिक सुरक्षा र कर्मचारीलाई दिइने निवृत्तिभरणको चापले राज्यलाई ठूला भार पर्ने बताएका छन् । प्रतितिधिसभाको मंगलबारको बैठकमा बोल्दै वाग्लेले राजनीतिक सहमति गरेर यसलाई सुधार गर्नुपर्ने बताएका हुन् ।
“दुईवटा कुराले हामीलाई पछि ठूलो दुःख दिनेवाला छ । एउटा समाजिक सुरक्षाको, यसपाली १५८ अर्ब भन्नुभएको छ । तर, त्यहाँ सोसियल असिस्टेन्टस्, सोसियल इन्स्योरेन्स र लेबर मार्केट, यो सबै जोडेर सोसियल प्रोटेक्सनको एउटा वृहत् आर्किटेक्चरलाई नै हेर्ने हो भने हामी दुई खर्ब नाघिसकेका छौँ,” उनले भने, “अर्को सेक्युरिटी फोर्सेज र ब्युरोक्रेसीको आकारबारे पनि राजनीतिक सहमति नै गरेर अप्रिय कदम चालेनौँ भने हामी दुर्घटनाउन्मुख छौँ ।”
पेन्सनको भार बढेको भन्दै त्यसलाई राजनीतिक नेतृत्वले निचोडमा पुर्याउनु पर्ने उनले बताए । मुलुकलाई भार हुने गरी काम गर्न नहुने पनि उनले बताए । ऋण लिएर आयोजना निर्माण गरिएको भए पनि त्यसले आर्थिक वृद्धिमा कुनै योगदान नदेखिएको उनको भनाइ छ ।
