काठमाडौं । राष्ट्रिय स्वतन्त्र पार्टी (रास्वपा)का उपसभापति एवं सांसद स्वर्णिम वाग्लेले व्यावसायिक क्षेत्रमा उधारो असुलीको ठूलो समस्या रहेको बताएका छन् । शुक्रबार प्रतिनिधिसभा बैठकमा उनले उधारो असुली ऐन एक सातामा पारित गर्ने भए आफूहरू प्रस्तावक बस्ने बताए ।
उनले सरकारले समस्या समाधान गर्न चाहेको भए ‘जाम’ भएको अर्थतन्त्रलाई चलायमान बनाउन बजारमा पैसा पठाउनुपर्नेमा जोड दिए । “उधारो अहिलेको ठूलो रोग हो । तीन/चार सय अर्बको उधारो, प्रेम आचार्यको म स्मरण गर्न चाहन्छु । मह र सेलरोटी बेच्ने, सुर्खेत र दैलेख इलेक्ट्रिक भेइकल चलाउने, निर्माण सामग्रीका सामान्य सिमेन्ट, छडका कुराहरूमा अड्किएर अर्थतन्त्रमा अहिले जाम भइरहेको छ । यसलाई खुकुलो बनाउनका लागि उधारो असुली ऐन – जसको प्रस्ताव अर्थ मन्त्रालय र उद्योग मन्त्रालयमा पनि छ, यो तुरुन्तै आओस्,” उनले भने, “राम्रो कामको हामी सपोर्ट गर्छौं । एक हप्तामा यसलाई पारित गरौँ, हामी नै प्रस्तावक बस्दिऊँला । सरकारले यस्ता अतिआवश्यक कुराहरू लिएर आउनुपर्यो ।”
उनले तत्काल बजारलाई चलायमान बनाउन एक हप्ताभित्रै गर्न सकिने काम सात महिना बितिसक्दा समेत सरकारले नगरेको बताएका छन् ।
लगानीजति जग्गामा गएर रोजगारी सिर्जना हुन नसकेको उनले टिप्पणी गरे । हाल व्यापक आर्थिक सुधारको ‘प्याकेज’ चाहिएकामा उनले जोड दिए ।
