विद्यालय आगलागी हुँदा एक करोडभन्दा बढीको क्षति

तेह्रथुम, (ससं) । आज बिहान फेदाप गाउँपालिका-२ ओयाक्जुङमा रहेको सिद्धकाली माध्यमिक विद्यालयमा आगलागी भएको छ। आगलागीमा परी एक करोड रुपैयाँभन्दा बढीका क्षति भएको छ ।
विद्यालयको प्रशासनिक भवनमा बिहान करिब ३:०० बजेदेखि आगलागी सुरु भएको विद्यालयका प्रधानाध्यापकले जानकारी दिएका छन् । आगलागीमा परी विद्यालयको प्रशासनिक भवनसहित अन्य भौतिक संरचना पूर्णरुपमा जलेर नष्ट भएको छ। आगलागी हुनुका कारण विद्युत् सर्ट हुनसक्ने प्रअले बताएका हुन् ।
आगलागीमा परी विद्यालयका प्रशासनिक कागजात, पुराना शैक्षिक अभिलेख, शैक्षिक सामग्रीलगायत अन्य भौतिक सामग्रीसमेत जलेर नष्ट हुँदा एक करोड रुपैयाँभन्दा बढीको क्षति भएको प्रारम्भिक अनुमान गरिएको जिल्ला प्रहरीले जानकारी दिएका हुन् । बिहान १०:०० बजे शैक्षिक विद्यार्थी, स्थानीय अभिभावक र प्रहरीले आगलागी नियन्त्रणमा लिएको विद्यालयले जनाएको छ।