\काठमाडौं, (ससं) । दाङ क्षेत्र नम्बर ३ का सांसद हीराबहादुर केसी शुक्रवार बिहान ९ बजे नेपालगञ्ज विमानस्थलबाट काठमाडौं ओर्लिए । काठमाडौं विमानस्थलमा उत्रनेबित्तिकै उनलाई फोन आयो र सोधियो, ‘कता हुनुहुन्छ कमरेड ?’ केसीको जवाफ थियो, ‘दाङमा छु ।’
फोनकर्ताले ‘तपाईं एयरपोर्टमै हुनुहुन्छ, हामी लिन आएका छौं’ भने । चिनजानकै ती फोनकर्तासँग केसी एयरपोर्ट आसपासकै एउटा होटलमा पुगे । त्यहाँ नेकपा ओली पक्षका सांसद महेश बस्नेत थिए । बस्नेतले केसीलाई ओली पक्षमा लाग्न आग्रह गरे । मन्त्री बन्नका लागि पहल गरिदिने आश्वासन समेत दिए । तर केसीले स्वीकारेनन् ।
झण्डै साढे २ घण्टाको दहलफसलपछि बस्नेत र केसी छुट्टिए । केसीले भनेअनुसार अहिले पनि फोनमार्फत ओली पक्षमा लाग्न उनलाई आग्रह आइरहन्छ ।
तनहुँका सांसद कृष्णकुमार श्रेष्ठलाई केही दिनअघि नेकपा अध्यक्ष पुष्पकमल दाहाल ‘प्रचण्ड’ले फोन गरे । आफ्नो समूहमा लागे नयाँ सरकार बनेपछि मन्त्री बनाउने र उनलाई भेट्न घरसम्मै आउने प्रस्ताव प्रचण्डको थियो । श्रेष्ठले स्वीकारेनन् । उनले बताएअनुसार पछिल्लो समय गुट परिवर्तनको आग्रह गर्दै दिनहुँ उनलाई दर्जनौं फोन कल आउँछन् ।
यी २ घटना उदाहरण मात्रै हुन् । अहिले नेकपामा सबैभन्दा धेरै चलेकै सांसदहरुको हिसाबकिताब हो । प्रतिनिधिसभा पुनर्स्थापना हुने संकेत पाएपछि प्रधानमन्त्री केपी शर्मा ओलीले आफ्नो हरेक सार्वजनिक सम्बोधनमा एउटा वाक्य छुटाएनन्, ‘संसदमा हर्स–ट्रेडिङ अर्थात् सांसदको किनबेच सुरू हुन्छ ।’
ओलीले संसद्को फोहोरी खेल २०५१ सालदेखि मुलुकको नयाँ संविधान बन्नुअघिसम्मको स्थितिमा पुग्ने प्रक्षेपण बारम्बार गर्दै आएका छन् । प्रतिनिधिसभा विघटनको निर्णय बदर भएपछि सबैभन्दा पहिले नेकपाको संसदीय दलमा नै सांसदहरुको तानातान सुरू भएको छ ।
प्रचण्ड–नेपालका तर्फबाट फोन गर्ने नेताहरुले सरकार बनेपछि ‘मन्त्री बनाइदिन्छौं’ भन्ने गरेका छन् । ओलीका तर्फबाट फोन गर्नेहरुले मन्त्री र पैसामध्ये एउटा रोजेर लिन प्रस्ताव गर्ने गरेको सांसदहरु नै बताउँछन् ।
सांसद जीवनराम श्रेष्ठले प्रधानमन्त्री ओलीको पद जोगाउनका लागि आफ्नो समूहका अधिकांश सांसदलाई प्रलोभनमा पार्ने कोसिस भइरहेको बताएका छन् । ‘नैतिकता पनि छैन, मूल्यमान्यता पनि छैन । उनीहरुले सकेजतिलाई एटेम्प्ट गरेका छन्, सम्भवै नभएका सांसदलाई पनि आफ्नो पक्षमा पार्न सकेजति लागेका छन् । आफू जस्तो संसार उस्तो भन्ने हुन्छ नि त १’ उनले भने, ‘मन्त्री खाने भए मन्त्री खाऊ, ठेली ९पैसा० लिने भए ठेली लेऊ भन्ने अफर साथीहरुलाई आएको छ । आफ्नो गलत कामलाई प्रमाणित गर्न कसरी हुन्छ, सांसदको संख्या बढाऔं भन्नेमै छन् ।’
प्रतिनिधिसभा भंग गरेर मध्यावधि चुनावमा जाने प्रधानमन्त्री ओलीको निर्णय सर्वोच्च अदालतले गत ११ गते बदर गरेपछि सडकमा देखिएको राजनीतिक खिचातानी संसद्मा फर्किने निश्चित भयो । संसद् सचिवालयमा प्रचण्ड–नेपाल पक्षको नेकपाले ओलीविरुद्ध पेश गरेको अविश्वासको प्रस्ताव कुनै न कुनै रुपमा ब्युँतिने भयो । प्रचण्ड–नेपाल पक्षले सबैभन्दा पहिले नेकपाको संसदीय दलमा ओलीविरुद्ध अविश्वासको प्रस्ताव ल्याएर उनलाई दलको नेताबाट हटाउने सम्भावना थियो ।
प्रतिनिधिसभा विघटन बदर हुनेबित्तिकै ओली पक्षका सांसद पनि आफ्नो पक्षमा खुलेरै लाग्ने अनुमान प्रचण्ड–नेपाल पक्षधरको थियो । प्रतिनिधिसभा विघटन बदर भएको २ दिनसम्म ओली पक्षका नेताहरुले पनि फेरि नेकपालाई एकताबद्ध बनाएर लैजानुपर्ने आशय सहितका कुरा गर्न थाले । तर प्रचण्ड–नेपाल कांग्रेस र जसपाका नेताहरुसँग सत्ता साझेदारीका लागि छलफल गर्न दौडिएका थिए ।
गत शुक्रवारयताको दृश्य फेरियो । प्रधानमन्त्री ओली बरु संसदीय दल र प्रतिनिधि सभामा समेत अविश्वासको प्रस्ताव आए सामना गर्ने तर तत्काल राजीनामा नदिने मनस्थितिमा पुगेका छन् । ओलीले यो संकेत गरेसँगै प्रचण्ड–नेपाल पक्षका दोस्रो तहका नेताहरुसँग संवाद अघि बढाएका उनीनिकटका नेताहरु कुराकानीमा बस्नै चाहेनन् ।
सोमवार मात्रै पोखराबाट प्रधानमन्त्री ओलीले पूर्ण आत्मविश्वाससहित भनेका छन्, ‘संसदीय दलको नेता विधिवत रुपमा फेरे डेढ वर्ष प्रतिपक्षमा बसौंला ।’
संसदीय परीक्षणमा सहभागी नभई हठात प्रतिनिधिसभा भंग गरेका ओलीले पछिल्लो समय त्यही संसदीय दलमाथि विश्वास गर्नुको कारण के हो रु ओलीनिकट सांसद महेश बस्नेत अहिले आफ्नो पक्षका सांसदको संख्या बहुमतनिकट पुगेको दाबी गर्छन् । उनले संसदीय दलमा २ पक्षको संख्यामा त्यतिधेरै फरक नहुँदा सांसद तानातान हुनु स्वाभाविक भएको बताएका छन् ।
‘कम्फर्टेबल बहुमत बनाउन तानातान त भइहाल्छ नि, यसलाई अस्वाभाविक मान्नै भएन,’ सांसद बस्नेतले भने, ‘संसदमा तानातान हुन्छ, फोहोरी खेल सुरू हुन्छ, त्यसैले निर्वाचनमा जाऔं भन्ने सरकारको भनाइ थियो । सर्वोच्च अदालतले वैकल्पिक सरकार बनाऊ भनेपछि वैकल्पिक सरकार बनाउने प्रयासअन्तर्गतकै तानातान हो यो ।’
बस्नेतले अहिले संसदीय दलमा देखिएको सांसदहरुको तानातान केही समयपछि प्रतिनिधि सभामा पनि देखिने बताएका छन् । ‘वैकल्पिक सरकार बनाउन आफ्नो संसदीय दलमा बलियो बन्न र अन्य दलहरुलाई कन्फिडेन्समा लिन यस्ता खेल भइहाल्छन् नि, यस्ता खेललाई अन्यथा ठान्नुभएन,’ उनले भने, ‘तर कुरा यत्ति हो, सम्बन्धित दल र त्यसका एक्टरहरुले सकेसम्म राजनीतिक संस्कारलाई ध्यान दिनुपर्यो ।’
प्रतिनिधिसभा विघटन हुनुअघिसम्म नेकपाको संसदीय दलको हिसाबकिताबमा ओली कमजोर थिए । गत पुस ५ गते ओलीविरुद्ध संसद् सचिवालयमा अविश्वासको प्रस्ताव दर्ता गर्दा प्रतिनिधिसभाका १७२ मध्ये ९० जनाले हस्ताक्षर गरेका थिए । तटस्थ बसेकाहरुको हिसाब छाड्ने हो भने पनि ओलीका पक्षमा ८२ जना मात्रै सांसद थिए । प्रचण्ड–नेपाल पक्षमा सांसद संख्या कायमै रहेको भए ओलीलाई संसदीय दलको नेताबाट हटाउन पर्याप्त हुन्थ्यो । तर अविश्वास प्रस्तावमा हस्ताक्षर गरेका ३ जना त मन्त्री पद मिलेसँगै ओलीको क्याम्पमा लागिसकेका छन् ।
प्रचण्ड–नेपाल पक्षीय नेकपामा ओलीतिरबाट आएको भनेर सांसदहरु खुलिसकेका छैनन् । त्यसैले संसदीय दलमा कुन समूहको पल्ला भारी हुन्छ, अहिल्यै यकिन गर्न निकै कठिन छ । तर ओली पक्षका नेताहरु प्रचण्ड–नेपालतिर ‘लो प्रोफाइल’ सांसदहरुलाई एकएक गरी भेटेर सम्झाउने र उनीहरुलाई सके मन्त्री नसके पैसाको अफर गर्ने गरेको ओलीनिकटकै नेताहरु स्वीकार गर्छन् ।
‘सांसदहरु आफ्नो पक्षमा ल्याउन ठूला नेताहरू लाग्दा धेरै हल्ला हुन्छ नि त १ त्यसैले हामी–हामी लाग्या छौं, ५–७ जना सांसद २–४ दिनमा यतै खुल्छन् होला । हामीलाई विश्वास नगर्ने सांसदलाई डाइरेक्ट बासँग पनि भेटाउने गर्या छौं,’ ओलीका तर्फबाट सांसदहरुसँग डील गरिरहेका एक नेताले भने, ‘एनिमल प्लानेट हेर्दा पनि देखिन्छ नि बाघले सबैभन्दा कमजोर र एक्लै बस्नेलाई अट्याक गर्छ । हाम्रो रणनीति ठ्याक्कै त्यही हो ।’
सत्ताबाहिर रहेकाले प्रचण्ड–नेपाल पक्षसँग भने तत्काल दिनका लागि आश्वासनबाहेक केही छैन । नेकपाका प्रचण्ड–नेपाल पक्षका प्रवक्ता नारायणकाजी श्रेष्ठले आफूहरुले लोकतन्त्रको पक्षमा उभिन सांसदहरुलाई अपिल गरिरहेको भए पनि सकारात्मक परिणाम आइनसकेको बताएका छन् । ‘हामीले वैचारिक, राजनीतिक, नीतिगत कुराका आधारमा पार्टीको एकीकृत स्वरुप कायम गर्न एक ठाउँमा बसौं भनेका छौं । जे–जे गर्न सकिन्छ, गरौं भन्ने उहाँहरूको रणनीति देखिन्छ,’ श्रेष्ठले भने, ‘हामीले प्रतिनिधिसभा पुनर्स्थापना भयो, लोकतान्त्रिक संघर्षमा सफल भयौं, रुपान्तरणमा जानुपर्छ भनेर अपिल गर्नु स्वाभााविकै हो । तर उताका सांसदहरु कुरा ठीक होइन पनि भन्दैनन्, छिट्टै निर्णय गरिहाल्ने पक्षमा पनि देखिँदैनन्, त्यसमाथि निर्वाचन आयोग अनिर्णित बनिदिँदा झन् अप्ठ्यारो भएको छ ।’
हुन त प्रतिनिधिसभा पुनर्स्थापना भएलगत्तै के गर्ने भन्ने योजना यो समूहसँग थिएन । त्यसैले सर्वोच्च अदालतको फैसला आएपछि अध्यक्षदेखि अरू नेताहरू पनि अलमलमा देखिन्छन् । फैसला पुनःस्थापनाको पक्षमा आए ओलीले राजीनामा दिइहाल्छन् भन्ने अनुमान फेल खाएपछि उनीहरूलाई झन् अप्ठ्यारो परेको हो । सांसदहरुलाई फोन गर्ने र आफ्नो पक्षमा आऊ भन्नेसम्म राजनीतिक भए पनि पैसा वा मन्त्रीकै लोभ दिएर बार्गेनिङ गर्न खोज्नु गैरराजनीतिक चरित्र भएको र अहिले बालुवाटारतिरबाटै त्यस्तै भइरहेको छ भन्ने आफूले सूचना पाएको प्रचण्ड–नेपाल नेतृत्वको नेकपाका स्थायी कमिटी सदस्य सुरेन्द्र पाण्डेले बताएका छन् ।
‘सत्तामा बस्नेलाई सजिलो छ, स्रोतसाधन उहाँहरुसँगै छ, आवश्यक परे अनुसन्धान विभाग प्रधानमन्त्रीकै नियन्त्रणमा छ, बालुवाटारको फोन आएको थियो, भेट्न बोलाएका थिए, पैसाको अफर गरेका छन् भनेर हाम्रातिरका धेरै सांसदले भनिरहेका छन्,’ उनले भनेका छन्, ‘फोन गरेर सहयोग गर भन्नेसम्मको कुरा ठूलो भएन, हामीले पनि भनेकै छौं । तर राजनीतिकभन्दा गैरराजनीतिक कुरा धेरै गरे र पो नोक्सान भयो त १’
२०५२ सालपछि नेपालको संसदीय राजनीतिको आचरणमा ठूलो ह्रास आएको थियो । सांसद किनबेचको शृंखला लगभग ५० को दशकभरि नै रह्यो । त्यतिखेरको ‘सुरा सुन्दरी काण्ड’ र सांसदहरुलाई थाइल्यान्ड घुमाउन पठाएको कुरा अहिले पनि राजनीतिको गलत अभ्यासका रुपमा परिचित छ । त्यसपछि सरकार टिक्दै नटिक्ने, सांसद किनिने र बेचिने सिलसिला दोस्रो संविधान सभासम्म पनि थियो । सरकार बनाउन र गिराउनकै लागि २०६४ सालयता एउटै दल ११ पटकसम्म पनि विभाजित भएको रेकर्ड संसद सचिवालयमा छ ।
ओली नेतृत्वको नेकपाका प्रवक्ता प्रदीप ज्ञवाली संसद पुनर्स्थापित भए यस्तै विकृति आउँछ भन्ने अनुमान रहेको भन्दै अहिले त्यसको संकेत देखा परिसकेको बताउँछन् । ‘मुलुकले खोजेको स्थिरता हो तर जे भयो, यसले विकृति जन्माउँछ । २०५२ सालमा पनि यस्तै उत्साही थिए साथीहरु । के परिणाम ल्यायो, हामीलाई थाहा छ,’ ज्ञवालीले भने, ‘अहिले संसदीय दलको मात्रै कुरा छ । त्यहाँभित्रको संख्याले पनि पुगेन, कानूनी विभाजनको बाटोमा गयो भने अरु दलहरुसँग पनि मिलाउनुपर्यो, भोलिका दिनहरुमा तानातान हुने त निश्चित नै छ । सधैंभरि गठबन्धन र त्यो गठबन्धनभित्र प्रधानमन्त्री कमजोर हुनेजस्तो देखियो अनि सांसदको किनबेच नहुने कुरै छैन ।’
ज्ञवालीले यसो भनिरहँदा उनकै पार्टी आबद्ध नेताहरुले नै सांसदलाई दबाब र प्रभावमा पारेको अर्को पक्षका सांसदहश्रको भनाइ छ । आफ्नो समूहका असन्तुष्ट सांसदसँग सञ्चार सम्पर्कमा रहिरहने र अर्को समूहका सांसदलाई विश्वासमा लिने गरेको नेता बस्नेतले पनि स्वीकार गरेका छन् ।
प्रचण्ड–नेपाल पक्षीय नेकपाका सांसद हीरा केसीको भनाइ पनि बस्नेतकोसँग मिल्दोजुल्दो नै देखिन्छ । ‘सरकारमा छन्, कहिले आफैं आन्दोलनमा जान्छौं भन्छन्, कहिले आफैंले अब सांसद किनबेच हुन्छ, अदालतले गल्ती गर्यो भन्छन्, फेरि आफैं किनबेच पनि गर्छन् । उनीहरूले पटक–पटक आउनुपर्यो, बालाई भेट्नुपर्यो भनेका छन्,’ केसीले भने, ‘उनीहरु सांसद तान्न व्यापक लागिरहेका छन् । अहिले मलाई मन्त्री चाहिएको छैन । किनिन, बेचिन मैले राजनीति गरेको हैन । दबाबले हामीलाई केही प्रभाव पर्दैन ।’
प्रधानमन्त्री ओलीले संसदीय दलभित्र तानातान हुन्छ भन्ने जानेरै मुख्य सचेतक पनि परिवर्तन गरिसकेका छन् । सहज बहुमत नहुँदासम्म दुवै समूहले संसदीय दलमा कुनै कदम चालिहाल्ने देखिँदैन । संसदमा अविश्वासको प्रस्ताव लैजान कांग्रेसको समर्थनसँगै दल विभाजन पनि आवश्यक देखिन्छ । ओलीले नियुक्त गरेका संसदीय दलका मुख्य सचेतक विशाल भट्टराईले पनि भर्खरै सुरू भएको सांसद तानातानको प्रक्रियानिकट भविष्यमा व्यापक हुन सक्ने बताए ।
‘व्यक्ति–व्यक्तिलाई कन्भिन्स गर्ने प्रयास भएकै छ । हाराहारीमा सांसद हुँदा जोडबल भई नै हाल्छ,’ भट्टराईले भने, ‘ल है सहयोग गर्नुहोस् त भनिहालिन्छ नि !’ कान्तिपुर दैनिकबाट
