काठमाडौं, (ससं) । ज्योति लाइफ इन्स्योरेन्स कम्पनीको सर्वसाधारण शेयर (आईपीओ) शुक्रबार (आज) देखि निष्कासन हुने भएको छ । कम्पनीले एक सय रुपैयाँका दरले ६६ करोड बराबरको ६६ लाख कित्ता सेयर निष्कासन गर्न लागेको हो ।
तीमध्ये पाँच प्रतिशत अर्थात् तीन लाख ३३ हजार कित्ता सामूहिक लगानी कोषलाई र तीन लाख ३३ हजार कित्ता कर्मचारीलाई सुरक्षित गरिएको छ । बाँकी रहेको ५९ लाख ४० हजार कित्ताका लागि सर्वसाधारणले आवेदन दिन सक्ने छन् । लगानीकर्ताले न्यूनतम १० कित्ता र अधिकतम ६६ हजार कित्तासम्मका लागि आवेदन दिन सक्नेछन् ।
उक्त आईपीओमा आज १० बजेदेखि छिटोमा फागुन २६ गतेसम्म र ढिलोमा चैत ६ गते बैंकिङ्ग समयसम्म आवेदन दिन सकिनेछ ।
कम्पनीको विक्री प्रबन्धक एनएमबि क्यापिटलले यसअघि यही फागुन २३ गतेदेखि आईपीओ निष्कासन गर्ने तयारी गरेको थियो । तर, सीडीएस एण्ड क्लियरिङ लिमिटेडले सिष्टममा प्राविधिक कठिनाइ आउन सक्ने भन्दै निष्कासनको मिति सार्न सुझाएपछि कम्पनीले फागुन २१ गते देखि निष्कासनको मिति तय गरेको हो ।
आईपीओ निष्कासनका लागि एनएमबी क्यापिटल बिक्री प्रबन्धक रहेको छ । आईपीओ विक्री तथा वितरणपश्चात् कम्पनीको चुक्ता पूँजी दुई अर्ब २० करोड रुपैयाँ पुग्नेछ ।
