काठमाडौं, (ससं) । विप्लव समूहको नेपाल कम्युनिस्ट पार्टीका महासचिव नेत्रविक्रम चन्द ‘विप्लव’ले आफूहरूले छाडेको २० महिना नहुँदै पुष्पकमल दाहाल ‘प्रचण्ड’ धुलोपिठो भएको टिप्पणी गरेका छन् । कपिलवस्तुको शिवगढी गाउँपालिकामा सोमबार आयोजित एक कार्यक्रमलाई सम्बोधन गर्दै महासचिव विप्लवले भने, ‘प्रचण्डले हाम्रो एक जना कमरेडलाई बोलाएर भन्नुभएछ, २० वर्ष मलाई कसैले हल्लाउन सक्दैनन् ।
तर, हामीले छाडेको २० महिना नहुँदै धुलोपिठो भइसक्नुभयो ।’‘ओली र प्रचण्ड मिल्दा जनताले सुखी भएर दुई तिहाई पनि दिनुभयो’ उनले भने, ‘सरकार बनाएको एक वर्षपछि उहाँहरुको लडाईँ शुरू भयो। जनताको बिषयमा मात्रै होइन । मेरो मान्छे किन नराखेको भन्दै आफ्नो भागको लडाई भइरहेको छ ।’
आफ्नो स्वार्थमा कुरा नमिलेपछि जनताको विश्वास भत्काएर एक–अर्काविरुद्ध खनिएको उनले बताए । त्यस्तै डा. बाबुराम भट्टराई र प्रचण्डले गलत बाटो हिडेकाले देशले समस्या भोग्नु परेको पनि बताए ।
