काठमाडौं । भारतीय सेनाले नेपाली सेनालाई झन्डै २९ करोडको स्वास्थ्य सामाग्री सहयोग गरेको छ । सेनाले २८ करोड ८० लाख भन्दा बढी मुल्य बराबरको स्वास्थ्य सामाग्री तथा उपकरण हस्तान्तरण गरेको हो।
‘छिमेकी पहिलो’ नीति अन्तर्गत भारतीय सेनाले प्रदान गरेको स्वास्थ्य सामाग्री तथा उपकरण शुक्रबार (हिजो) टुँडिखेलस्थित नेपाली सेनाको मुख्यालयमा आयोजित एक समारोहका बीच नेपालका लागि भारतीय राजदूत विनय मोहन क्वात्राले नेपाली सेनाका प्रधान सेनापति महारथी पूर्णचन्द्र थापालाई हस्तान्तरण गरेका हुन्।
भेन्टिलेटर, एम्बुलेन्स, आइसीयू बेड, पीपीइ किट, पिसीआर परीक्षण किटलगायतका स्वास्थ्य सामाग्री जेठ २७ गते काठमाडौं आइपुगेको थियो। गत साल यता भारतीय सेनाले नेपाली सेनालाई कोभिड महामारी विरुद्ध लड्न विभिन्न किसिमका सहयोग प्रदान गर्दै आएको छ।
