काठमाडौं । काठमाडौं महानगरपालिका वडा नम्बर २४ स्थित मखन टोलमा नेपाल स्वयंसेवी रक्तदाता समाज २० र २४ वडा नगर समितिको संयोजन तथा व्यवस्थापनमा रक्तदान कार्यक्रम सम्पन्न भएको छ । स्वयंसेवी शतक रक्तदाता एवं नेपाल स्वयंसेवी रक्तदाता समाजका केन्द्रीय अध्यक्ष प्रेमसागर कर्माचार्यको विशेष उपस्थितिमा शुक्रबार काठमाडौं विश्व विद्यालयमा अध्ययनरत बिद्यार्थीहरूद्वारा उक्त रक्तदान कार्यक्रम आयोजना गरिएको हो ।
उक्त कार्यक्रममा नेपाल रेडक्रस सोसाइटी स्वास्थ्य सेवा बिभागकी निर्देशक डा. मनिता राजकर्णिकार र महानगरीय प्रहरी वृत्तका प्रमुख डि.एस.पी. डिलबहादुर मल्लसमेत उपस्थिति रहेको थियो ।
कार्यक्रममा महिला तथा पुरूष गरि ४१ जनाले रक्तदान गरेका थिए । रक्तदान कार्यक्रमको संयोजन नेपाल स्वयंसेवी रक्तदाता समाज २० वडा नगर समितिका अध्यक्ष राम रञ्जितले गरेका थिए । त्यस्तै नेपाल स्वयंसेवी रक्तदाता समाज २० वडा नगर समितिका अध्यक्ष सुरेश सिलाकारले सभापतित्वको भूमिका निर्वाह गरेका थिए । साथै कार्यक्रमको संयोजकमा काठमाडौं विश्वविद्यालयमा अध्ययनरत छात्रा युनिशा महर्जन रहेकी थिइन् ।
