काठमाडौं । सरकारले उच्च आयात कारण तरलता अभाव भएको भन्दै चकलेटको लगायत विभिन्न चरणमा कडाइ गरेको थियो । सरकारले गत वर्षको पुस र माघ महिना गरी दुई चरणमा विभिन्न ४७ वटा वस्तुको आयातमा कडाइ गरेको हो।
नेपाल राष्ट्र बैंकले विलासिताको वस्तुभन्दै पहिलो चरणमा २० वटा र दोस्रो चरणमा २७ वटा वस्तु गरी ४७ वटा वस्तुको आयातमा शतप्रतिशत र ५० प्रतिशत मार्जिनको व्यवस्था गरेको थियो । राष्ट्र बैंकले कडाइ गरेकोमध्ये चकलेक पनि एक हो ।
सरकारले चकलेट आयातमा शतप्रतिशत मार्जिनको व्यवस्था गरेको थियो । उक्त व्यवस्था हालै मात्रै खारेज गरेको छ । तर, सरकारले आयातमा कडाइ गरेपनि चकलेट आयातमा भने कुनै प्रभाव परेको छैन ।
भन्सार विभागको तथ्याङक्अनुसार चालु आर्थिक वर्षको ६ महिनाको अवधिमा मात्रै करिब डेढ अर्बको चकलेट आयात गरेको देखाउँछ । गत साउनदेखि पुस मसान्तसम्ममा नेपालले १ अर्ब ३४ करोड २२ लाख ७१ हजार रुपैयाँको ३२ लाख ४७ हजार १८१ केजी चकलेट आयात गरेको छ । साथै, नेपालले उक्त आयातित चकलेटबाट १ अर्ब ५ करोड ११ लाख ४६ हजार रुपैयाँ भन्सार महसुल संकलन गरेको छ ।
त्यस्तै, सरकारले गत वर्षको पुससम्ममा चकलेटको आयातमा कुनै कडाइ गरेको थिएन । विभागका अनुसार गत वर्षको ६ महिनाको अवधिमा नेपालले १ अर्ब ४१ करोड ८७ लाख ४९ हजार रुपैयाँको ४४ लाख ३४ हजार ११९ केजी चकलेट आयात गरेको थियो । जसमा सरकारले ९२ करोड २० लाख रुपैयाँ राजस्व संकलन गरेको हो । उक्त तथ्याङ्क हेर्दा चकलेट आयातमा शतप्रतिशत मार्जिनको व्यवस्था गर्दासमेत उच्च आयात भएको स्पष्ट छ ।
