काठमाडौं । उपप्रधान एवं अर्थमन्त्री विष्णुप्रसाद पौडेलले लघुवित्त वित्तीय संस्थाहरूको समस्या समाधान गर्न सरकार गम्भीर भएर लागिपरेको बताएका छन् । बुधबार प्रतिनिधिसभा बैठकपश्चात् संसद् भवन परिसरमा सञ्चारकर्मीलाई प्रतिक्रिया दिँदै उनले यस्तो भनेका हुन् ।
लघुवित्तमा देखिएको वर्तमान समस्या समाधानका लागि सरोकारवालासँग गम्भीर रूपमा छलफल भइरहेको उनले बताए । उनले भने “लघुवित्तका समस्याको सम्बन्धमा ध्यानाकर्षण भएको मात्रै होइन, यो विषयमा गम्भीर भएर सरोकारवालाहरू सहित बैठक बसेका छौँ,” ।
विभिन्न चरणमा बैठक बसेर केही महत्त्वपूर्ण निर्णयहरू समेत भइसकेको उनको भनाइ छ । अर्थमन्त्री पौडेलले अहिले लघुवित्तका ऋणीहरू प्रभावित हुने अवस्था आएको भन्दै समस्या समाधानका लागि सम्बन्धित निकायले काम थालेको बताएका छन् ।
“केही महत्त्वपूर्ण निर्णयहरू पनि गरेका छौँ । लघुवित्तको क्षेत्रमा जुन प्रकारको समस्या छ, लघुवित्तका ऋणीहरू प्रभावित हुने अवस्था आएको छ,” उनले भने, “समस्या आउनुको कारणहरू खोजेर त्यसको समाधानको लागि सम्बन्धित निकायहरू लागिसकेका छन् । त्यसका परिणामहरू निरन्तर आउँदै छन् ।”
उनले अर्थतन्त्रमा देखिएको समस्या र चुनौतीको समाधान गर्न सरकारकेन्द्रित भएको जिकिर गरे ।
