काठमाडौं । नेपाल स्वयंसेवी रक्तदाता समाजले रातो मच्छिन्द्रनाथको भोटो देखाउने पवित्र धार्मिक स्थल ललितपुरस्थित जावलाखेलमा लायन्स क्लब अफ काठमाडौं, युनाइटेड सेन्ट्रल र रिलायन्स फाइनान्स लिमिटेडको संयुक्त आयोजनामा रक्तदान कार्यक्रम सम्पन्न गरेको छ । कोभिड–१९ को महामारीले रक्त व्यवस्थापनमा पारेको नकारात्मक प्रभावलाई न्यूनीकरण गर्दै उपचारका क्रममा पीडित पक्षलाई रगत र रगतबाट तयार पारिएका रक्त तत्वहरूको उपलब्धतामा सहजता मिल्न सकोस् भनि उक्त कार्यक्रम आयोजना गरिएको हो ।
हालैमात्र लोकार्पण गरिएको ‘अठार वर्ष,पैतालिस किलो,रक्तदान गर्न नगरौं ढिलो’ बोलको गीतले साँगीतिक गुञ्जयमानका साथ आयोजना गरिएको रक्तदान कार्यक्रममा ४१ जना महिला तथा पुरूषले रक्तदान गरेका थिए ।
नेपाल स्वयंसेवी रक्तदाता समाजका केन्द्रीय अध्यक्ष एवं स्वयंसेवी शतक रक्तदाता प्रेमसागर कर्माचार्यको प्रमुख उपस्थितिमा उक्त रक्तदान कार्यक्रममा आयोजना गरिएको हो । रक्तदान गर्नुहुने स्वयंसेवी रक्तदाताहरूलाई अध्यक्ष कर्माचार्य र कार्यक्रमको संयोजन तथा व्यवस्थापन गरेका रिलायन्स् फाइनान्स् लिमिटेडका प्रमुख कार्यकारी अधिकृत अनिल श्रेष्ठले संयुक्तरूपमा प्रशंसा–पत्र बितरण गरेका थिए ।
लायन्स क्लब अफ काठमाडौं युनाइटेड सेन्ट्रलका अध्यक्ष रोशन कुमार श्रेष्ठको सभापतित्वमा सञ्चालित सो रक्तदान कार्यक्रममा स्वास्थ्य सेवा विभाग,नेपाल रेडक्रस सोसाइटीकी निर्देशक डा. मनिता राजकर्णिकारको समेत उपस्थिति रहेको थियो ।
