काठमाडौं । चालु आर्थिक वर्ष २०८०/८१ को चार महिनामा वाणिज्य बैंकहरुले साढे २० अर्बभन्दा बढी नाफा आर्जन गरेका छन्। चार महिनाको अवधिमा वाणिज्य बैंकहरुले २० अर्ब ७३ करोड २२ लाख ६० हजार खुद नाफा आर्जन गरेको नेपाल राष्ट्र बैंकले जानकारी दिएको छ । जुन गत असोज मसान्तसम्मको तुलनामा एक अर्ब १८ करोड ८५ लाख रुपैयाँले बढेको हो ।
गत असोज मसान्तसम्ममा भने बैंकहरूले १९ अर्ब ५४ करोड ३७ लाख रुपैयाँ खुद नाफा कमाएका थिए ।
चालु आवको पहिलो चौमासिकमा सबैभन्दा धेरै नाफा भने नबिल बैंकले कमाएका छ । बैंकले चार महिनामा २ अर्ब १६ करोड ९६ लाख बढी खुद नाफा कमाएको छ । गत असोजमा भने नबिल बैंक धेरै नाफा कमाउनेको दोस्रो सूचीमा थियो ।
धेरै नाफा कमाउनेको दोस्रो स्थान भने ग्लोबल आइएमई बैंक देखिएको छ । बैंकले चार महिनामा १ अर्ब ९४ करोड ६९ लाख रुपैयाँ नाफा कमाएको छ । एक महिनामै कम्पनीले १६ करोड ७५ लाख रुपैयाँ नाफा कमाएको हो । गत असोज मसान्तसम्ममा बैंकले १ अर्ब ७७ करोड ९४ लाख रुपैयाँ खुद नाफा कमाएको थियो ।
तेस्रो सूचीमा रहेको नेपाल इन्भेष्टमेन्ट मेगा बैंकले १ अर्ब ८६ करोड ६८ लाख बढी नाफा कमाएको छ । चौथो सूचीमा भने प्राइम कमर्सियल बैङ्क देखिएको छ । चार महिनामा बैंकले १ अर्ब ५३ करोड ४४ लाख रुपैयाँ खुद नाफा कमाएको छ ।
यस्तै, हिमालयन बैंकले चार महिनामा १ अर्ब ५० करोड ६६ लाख, एनआइसी एशियाले १ अर्ब ३७ करोड ७६ लाख, राष्ट्रिय वाणिज्य बैंकले १ अर्ब २० करोड ६७ लाख, एनएमबि बैंकले १ अर्ब २३ करोड ८५ लाख, एभरेष्टले १ अर्ब ८ करोड २ लाख, प्रभुले १ अर्ब ५ करोड ७९ लाख रुपैयाँ खुद नाफा कमाएका छन् ।
कात्तिक मसान्तसम्ममा स्ट्याण्डर्ड चार्टर्डले ९८ करोड १९ लाख, नेपाल बैङ्कले ६६ करोड ८१ लाख, नेपाल एसबिआईले ६० करोड ५६ लाख, माछापुच्छ्रेले ६७ करोड १५ लाख, कुमारीले ८८ करोड ८० लाख, लक्ष्मी सनराइजले ५१ करोड ५९ लाख, सिद्धार्थले ३३ करोड ३८ लाख, सानिमाले ७७ करोड ७८ लाख रुपैयाँ खुद नाफा कमाएका छन् ।
यता, सरकारी स्वामित्वमा रहेको कृषि विकास बैंक नोक्सानीमा देखिएको छ । यो बैंकले नोक्सानी रकम भने घटाएको देखिएको छ । कात्तिक मसान्तसम्म बैंक २७ करोड ८८ लाख रुपैयाँ नोक्सानीमा देखिन्छ । चालु आवको पहिलो त्रैमासमा पनि बैंकले ९० करोड ३१ लाख बढी नोक्सानी व्यहोरेको थियो ।
