काठमाडौं। मुख्यमन्त्री नियुक्त भएपछि बधाई दिन आउनेहरुको भीडले गर्दा अन्य काममा असर परेको प्रदेश १ का मुख्यमन्त्री हिक्मतकुमार कार्कीले बताएका छन्।
प्रेस चौतारी नेपालको २५औं स्थापना दिवसको अवसरमा आइतबार विराटनगरमा आयोजित कार्यक्रममा बोल्दै उनले बधाई दिन आउनेहरुको भीडले काममा असर गरेको बताएका हुन् ।
उनले भने, बधाई दिन आउनेलाई भेट्दिन भन्न पनि मिलेन एकपछि अर्को टिम आउँदा अन्य काममा पनि असर परेको अनुभूति भएको छ । पुस २५ गते मुख्यमन्त्री नियुक्त भएका कार्कीलाई बधाई दिने क्रम अझै नरोकिएको बताएका छन् ।
कार्यक्रममा बोल्दै मुख्यमन्त्री कार्कीले कानूनबाटै प्रदेश सञ्चार प्रतिष्ठान गठन गर्ने बताएका हुन् । अघिल्लो सरकारले संसदमा पेस गरेको विधेयक संसदीय समितिमा विचाराधिन थियो । मुख्यमन्त्री कार्कीले नयाँ कानून बनाएर प्रदेश सञ्चार प्रतिष्ठान गठन गर्ने बताएका छन्।
उनले प्रदेशको नाम सकेसम्म सहमतिका आधारमा गर्ने बताए । सहमति हुन नसके प्रक्रियामा लैजाने उनको भनाइ छ ।